Revanth vs KTR : తెలంగాణ రాజకీయాల్లో ఇప్పుడు సరికొత్త రాజకీయ సమరం ఏర్పడింది. అధికార కాంగ్రెస్, ప్రతిపక్ష బీఆర్ఎస్ మధ్య మాటల వ్యక్తిగత విమర్శల స్థాయికి చేరింది. ముఖ్యమంత్రి రేవంత్ రెడ్డి, బీఆర్ఎస్ వర్కింగ్ ప్రెసిడెంట్ కేటీఆర్‌ను లక్ష్యంగా చేసుకుని చేస్తున్న వ్యాఖ్యలు రాజకీయ వర్గాల్లో ఆసక్తి చర్చకు తెరలేపుతున్నాయి. ఒకప్పుడు కేసీఆర్‌ను ప్రధాన ప్రత్యర్థిగా భావించిన రేవంత్.. ఇప్పుడు కేటీఆర్‌తోనే నేరుగా తలపడుతున్నారా? కేసీఆర్ రాజకీయంగా మౌనం వహిస్తున్న వేళ.. కేటీఆర్‌ను బీఆర్ఎస్ ప్రధాన ముఖంగా గుర్తిస్తున్నారా? అనే ప్రశ్నలు తెరపైకి వస్తున్నాయి.
కేసీఆర్ మౌనం.. కేటీఆర్‌కు బాధ్యతలు!
బీఆర్ఎస్ అధినేత, మాజీ ముఖ్యమంత్రి కేసీఆర్ గతంతో ప్రత్యక్ష రాజకీయాల్లో, బహిరంగ సభల్లో మీడియా ముందుకు రావడం తగ్గించారు. దీనితో అసెంబ్లీ లోపల, బయట ప్రభుత్వంపై విమర్శలు గుప్పించే బాధ్యతను కేటీఆర్, హరీశ్‌రావు ప్రధానంగా తీసుకుంటున్నారు. ముఖ్యంగా కేటీఆర్ ప్రభుత్వాన్ని ప్రశ్నిస్తూ, సీఎం రేవంత్‌ను లక్ష్యంగా చేసుకుని విమర్శలు చేస్తున్నారు. ఈ పరిణామాల నేపథ్యంలో రేవంత్ రెడ్డి కూడా కేటీఆర్‌నే తన ప్రధాన రాజకీయ ప్రత్యర్థిగా ఎంపిక చేస్తారా? అనే విశ్లేషణలు మొదలయ్యాయి. కేసీఆర్‌ను పక్కనపెట్టి కేటీఆర్‌తోనే రాజకీయ పోరును కొనసాగించడం బీఆర్‌ఎస్‌లో ఆయన ప్రాధాన్యాన్ని మరింత పెంచుతున్నారనే అభిప్రాయాలు వ్యక్తమవుతున్నాయి.
గడ్డం.. గెటప్.. వ్యక్తిగత విమర్శలు!
ఇటీవలి కాలంలో రేవంత్ రెడ్డి ప్రసంగాల్లో కేటీఆర్ వ్యక్తిగత రూపం, గడ్డం, హెయిర్ ట్రాన్స్‌ప్లాంటేషన్ వంటి అంశాలు ప్రస్తావనకు వస్తున్నాయి. గడ్డం పెంచినంత మాత్రాన ఎవరూ రేవంత్ రెడ్డి కాలేరంటూ సీఎం చేసిన వ్యాఖ్యలు రాజకీయంగా దుమారం రేపాయి. విధానపరమైన విమర్శలు, ప్రభుత్వ వైఫల్యాలపై చర్చించాల్సిన రాజకీయ వేదిక వ్యక్తిగత విమర్శలకు వేదికగా మారుతోందనే అభిప్రాయాలు వినిపిస్తున్నాయి. అయితే, ఈ వ్యాఖ్యల వెనుక కేవలం రాజకీయ ఆగ్రహమే కాకుండా ప్రత్యర్థి మానసిక స్థైర్యాన్ని దెబ్బతీసే వ్యూహం కూడా ఉండొచ్చనే విశ్లేషణలు ఉన్నాయి.
రేవంత్ మార్క్ మాస్ పాలిటిక్స్!
కేటీఆర్‌కు ఉన్న అర్బన్, మోడ్రన్ లీడర్ ఇమేజ్‌కి భిన్నంగా తనను తాను కేడర్ నుంచి ఎదిగిన మాస్ నాయకుడిగా ప్రజల్లో నిలబెట్టాలని రేవంత్ ప్రయత్నిస్తున్నారని విశ్లేషణలు ఉన్నాయి. తెలంగాణ రాజకీయాల్లో మాస్ ఇమేజ్‌కి ఉన్న ప్రాధాన్యాన్ని దృష్టిలో పెట్టుకుని ఈ తరహా వ్యాఖ్యలు చేస్తున్నారనే అభిప్రాయాలు వ్యక్తమవుతున్నాయి. కేటీఆర్ ప్రభుత్వంపై లేవనెత్తుతున్న పరిపాలన అంశాల నుంచి చర్చను వ్యక్తిగత విమర్శల వైపు మళ్లించే ప్రయత్నమా? అనే ప్రశ్న ఉత్పన్నమవుతోంది.
ప్రజా సమస్యలు పక్కకు.. పొలిటికల్ ఫైట్ ముందుకు!
మూసీ ప్రక్షాళన, ఆరు గ్యారెంటీల అమలు, విద్యుత్, సాగునీరు, ఇతర ప్రజా సమస్యలపై బీఆర్ఎస్ ప్రభుత్వాన్ని ప్రశ్నిస్తోంది. ఇలాంటి అంశాలకు సమాధానం చెప్పాల్సిన అధికార పక్షం వ్యక్తిగత విమర్శలకు ప్రాధాన్యత ఇవ్వడం సరికాదని బీఆర్ఎస్ నేతలు ఎదురుదాడి చేస్తున్నారు. ప్రజా సమస్యలపై చర్చ జరగాల్సిన సమయంలో నేతల గడ్డం, గెటప్‌లపై రాజకీయాలు చేయడం వల్ల ప్రజలకు ఒరిగేదేమీ లేదని విమర్శిస్తున్నారు.
అంతిమంగా ఎవరికి లాభం?
రేవంత్ రెడ్డి కేటీఆర్‌ను లక్ష్యంగా చేసుకోవడం వెనుక రాజకీయంగా పలు కోణాలు కనిపిస్తున్నాయి. కేసీఆర్ గైర్హాజరీలో కేటీఆర్‌ను ప్రధాన ప్రత్యర్థిగా నిలబెట్టడమా? ఆయన రాజకీయ ఇమేజ్‌ను దెబ్బతీయడమా? లేక ప్రజల దృష్టిని ఇతర అంశాల నుంచి మళ్లించడమా? అన్నది చర్చనీయాంశంగా మారింది. ఏది ఏమైనా తెలంగాణ రాజకీయాల్లో ఇప్పుడు కేసీఆర్ వర్సెస్ రేవంత్ కంటే రేవంత్ వర్సెస్ కేటీఆర్ పోరే ఎక్కువగా ఉంది. ఈ రాజకీయ సమరంలో పైచేయి ఎవరిదన్నది రాబోయే రోజుల్లో తేలుతుంది.
