Donald Trump : అమెరికా మిడ్‌టర్మ్ ఎన్నికల్లో డెమోక్రాట్లు ఘన విజయం సాధించడంతో అధ్యక్షుడు డొనాల్డ్ ట్రంప్‌కు రాజకీయ కష్టాలు మొదలయ్యాయా? ఇన్నాళ్లూ తన మాటే శాసనంగా సాగిన ట్రంప్‌కు ఇప్పుడు సొంత దేశంలోనే ఎదురుగాలి వీస్తోందా? అసలు డెమోక్రాట్ల విజయం ట్రంప్ పదవికి ఎసరు పెట్టనుందా? ఆయనను అధ్యక్ష పీఠం నుంచి దించేయడం సాధ్యమేనా? ఇప్పుడు అమెరికా రాజకీయ వర్గాల్లో ఇదే హాట్ టాపిక్‌గా మారింది.
మధ్యంతర ఎన్నికల్లో డెమోక్రాట్లు అదరగొట్టారు. ప్రతినిధుల సభ (హౌస్ ఆఫ్ రిప్రజెంటేటివ్స్)లో 240 సీట్లు సాధించి ఆధిపత్యాన్ని ప్రదర్శించారు. అయితే సెనెట్ విషయంలో మాత్రం పరిస్థితి కొంత భిన్నంగా ఉంది. అక్కడ డెమోక్రాట్లకు 100 స్థానాలకు గాను 54 సీట్లు మాత్రమే దక్కాయి. అంటే ట్రంప్‌ను ఇరుకున పెట్టే అవకాశం వచ్చిందా.. ఏకంగా అధ్యక్ష పదవి నుంచి సాగనంపేంత బలం మాత్రం ఇంకా చేతికి రాలేదు.
అమెరికా అధ్యక్షుడిపై అభిశంసన ప్రక్రియను ప్రారంభించే అధికారం రాజ్యాంగ ప్రతినిధుల సభకు ఉంటుంది. సాధారణ మెజారిటీతో అభిశంసన తీర్మానాన్ని ఆమోదించవచ్చు. కానీ అంతటితో వచ్చిన అధ్యక్షుడి పదవికి ముప్పుట్లు కాదు. అసలు కథ సెనెట్‌లోనే ఉంటుంది. అక్కడ అధ్యక్షుడిని దోషిగా నిర్ధారించి పదవి నుంచి తొలగించాలంటే సభ్యుల్లో మూడింట రెండొంతుల మంది, అంటే 100 మందిలో కనీసం 67 మంది మద్దతు అవసరం. ప్రస్తుతం డెమోక్రాట్ల బలం 54 సీట్లకే పరిమితం కావడంతో మరో 13 మంది మద్దతు తప్పనిసరి. అంటే సొంత పార్టీ సభ్యుల బలంతోనే ట్రంప్‌ను పంపడం సాధ్యం కాదు. రిపబ్లికన్లలోనూ కొందరు మనసు మార్చుకోవాలి. రాజకీయాల్లో అది అంత సులభమైన వ్యవహారం కాదు!
అయితే డెమోక్రాట్లు చేతులు ముడుచుకుని కూర్చుంటారని అనుకోవడం పొరపాటే. ట్రంప్ ప్రభుత్వ నిర్ణయాలపై విచారణలు, దర్యాప్తులతో ఉక్కిరిబిక్కిరి చేసే అవకాశం ఉంది. ముఖ్యంగా వలస విధానాలు, రక్షణ మంత్రి పీట్ హెగ్సేత్ వ్యవహారాలు, ట్రంప్ కుటుంబానికి సంబంధించిన కాంగ్రెస్ దర్యాప్తులకు ఆదేశాలు ఉన్నాయి. ప్రభుత్వ పాలనలోని లోపాలను ఎత్తిచూపుతూ రిపబ్లికన్ పార్టీని రాజకీయంగా ఇబ్బందుల్లోకి నెట్టేందుకు డెమోక్రాట్లు వ్యూహాలు సిద్ధం చేయవచ్చు.
ఇక్కడే ట్రంప్‌కు అసలైన పరీక్ష మొదలవుతుంది. ఇప్పటివరకు ప్రత్యర్థులను విమర్శిస్తూ, మీడియాపై విరుచుకుపడుతూ, తన నిర్ణయాన్ని సరైన రీతిలో సమర్థించుకుంటూ వచ్చిన ఆయనకు ఇకపై ప్రతిపక్షం నుంచి ప్రతి అడుగులోనూ ఎదురుకావచ్చు. కాంగ్రెస్ కమిటీల విచారణలు, పత్రాల సమర్పణలు, అధికారుల వివరణలు.. ఇలా వైట్‌హౌస్‌కు రోజుకో కొత్త తలనొప్పి తప్పదు.
డెమోక్రాట్లు ఎన్నికల్లో గెలిచినంత మాత్రాన ట్రంప్‌ను వెంటనే అధ్యక్ష పీఠం నుంచి దింపడం సాధ్యం కాదు. కానీ ఆయన పాలనకు కళ్లెం వేయడం, నిర్ణయాలను అడ్డుకోవడం, రాజకీయంగా ఉక్కిరిబిక్కిరి చేయడం మాత్రం వారి చేతుల్లోనే ఉంది. ఇప్పటివరకు ట్రంప్ ప్రత్యర్థులకు చుక్కలు చూపిస్తే.. ఇకపై ట్రంప్‌కు చుక్కలు చూపించే పరిస్థితి రావచ్చు. అధ్యక్ష కుర్చీ ప్రస్తుతానికి పదిలంగానే ఉన్నా.. ఆ కుర్చీలో కూర్చుని ప్రశాంతంగా పాలించే రోజులు మాత్రం తగ్గినట్లే కనిపిస్తున్నాయి!
అంటే ట్రంప్‌ను ఇప్పుడే దించలేరు.. కానీ ఆయనకు రోజూ రాజకీయ పరీక్షలు పెట్టే అవకాశం మాత్రం డెమోక్రాట్లకు దక్కింది. వైట్‌హౌస్‌లో ట్రంప్ ఉన్నా.. కాంగ్రెస్‌లో మాత్రం డెమోక్రాట్లదే హవా అన్నమాట!
