అడవిలో స్వేచ్ఛగా తిరుగుతూ ప్రకృతి అందాలను పెంచే మూగజీవాలపై తుపాకీ గురిపెట్టారు. జింకల వేట కోసం అడవిలోకి వెళ్లి.. ఏకంగా 12 రౌండ్ల కాల్పులు జరిపినట్లు ఆరోపణలు వచ్చాయి. అయితే, వారి వేట గుట్టు అడవిలో కాదు.. హైదరాబాద్‌లో బయటపడింది. మలక్‌పేటలో పోలీసులు నిర్వహించిన వాహన తనిఖీలు.. ఈ వ్యవహారాన్ని వెలుగులోకి తెచ్చాయి.
స్కార్పియోలో ఆయుధాలు.. పోలీసులకు అనుమానం.!
మలక్‌పేట రేస్‌కోర్స్‌ రోడ్డులో వాహనాల తనిఖీలు నిర్వహిస్తున్న పోలీసులు.. ఓ మహీంద్రా స్కార్పియోను ఆపి తనిఖీ చేశారు. అందులో లైసెన్స్ కలిగిన .30-06 స్పోర్టింగ్ రైఫిల్, ఎనిమిది లైవ్ బుల్లెట్లు, 12 ఖాళీ కార్ట్రిడ్జ్‌లు కనిపించాయి. అంతేకాదు.. రాత్రివేళల్లో వేటకు ఉపయోగించే రెండు నైట్ విజన్ టెలిస్కోప్‌లు, బ్యాటరీ కూడా పోలీసుల కంటపడింది. దీంతో అనుమానం వచ్చిన పోలీసులు లోతుగా విచారణ చేపట్టారు.
కర్ణాటక అడవుల్లో ఏం జరిగింది.?
విచారణలో కర్ణాటకలోని కలబురగి జిల్లా చించోళి తాలూకా చిమ్మన్‌చోడ్ ప్రాంతంలో జింకల వేటకు వెళ్లినట్లు వెలుగులోకి వచ్చింది. ముగ్గురూ కలిసి రైఫిల్‌తో 12 రౌండ్ల కాల్పులు జరిపినట్లు దర్యాప్తులో తేలిందని పోలీసులు గుర్తించారు. అడవిలో మూగజీవాల ప్రాణాలకు ముప్పుగా మారిన ఈ ఘటనపై మరిన్ని వివరాలు సేకరిస్తున్నారు.
వేట వీడియోలున్న ఫోన్ ధ్వంసం చేశారా.?
ఈ కేసులో మరో ఆసక్తికర అంశం బయటపడింది. వేటకు సంబంధించిన వీడియోలు ఉన్నట్లు అనుమానిస్తున్న హువావే ఫోల్డబుల్ మొబైల్ ఫోన్‌ను ధ్వంసం చేసినట్లు ఆరోపణలు ఉన్నాయి. ఆ ఫోన్‌లో ఏం ఉందా? వేటకు సంబంధించిన దృశ్యాలను చెరిపేయాలనే ఉద్దేశ్యంతోనే ఫోన్‌ను ధ్వంసం చేశారా? అనే కోణంలో పోలీసులు దర్యాప్తు చేస్తున్నారు.
ముగ్గురు అరెస్ట్.. వేట గుట్టుపై ఆరా.!
ఈ వ్యవహారంలో సయ్యద్ హుస్సేన్, సయ్యద్ ఒమర్, మహమ్మద్ హమీద్‌లను మలక్‌పేట పోలీసులు అరెస్ట్ చేశారు. వారి నుంచి నాలుగు మొబైల్ ఫోన్లు, రైఫిల్, బుల్లెట్లు, ఇతర సామగ్రిని స్వాధీనం చేసుకున్నారు. వేటకు ఉపయోగించినట్లు అనుమానిస్తున్న స్కార్పియోను సీజ్ చేశారు.
వన్యప్రాణుల సంరక్షణ చట్టం, ఆర్మ్స్ యాక్ట్ వంటి సంబంధిత చట్టాల కింద కేసు నమోదు చేయబడింది. క్రైమ్ నంబర్ 391/2026గా కేసు నమోదు చేసి దర్యాప్తు కొనసాగిస్తున్నట్లు మలక్‌పేట ఇన్‌స్పెక్టర్ కె. వెంకట్ రెడ్డి తెలిపారు.
తుపాకీ శబ్దాలకు అడవి దద్దరిల్లిందా? మూగజీవాల ప్రాణాలతో చెలగాటమాడిన ఈ వేట వెనుక ఇంకా ఏమైనా రహస్యాలు ఉన్నాయా? పోలీసులు సాగిస్తున్న దర్యాప్తులో మరిన్ని వివరాలు వెలుగులోకి వచ్చే అవకాశం ఉంది.
[ Hyderabad Deer Hunting Case, Malakpet Police, Deer Meat Seizure, Illegal Wildlife Hunting, Karnataka Forest Hunting, Chincholi Forest, Syed Hussain, Syed Omar, Mohammed Hameed, .30-06 Sporting Rifle, 12 Rounds Fired, Wildlife Protection Act, Arms Act, Mahindra Scorpio Seized, Hyderabad Crime News, Malakpet News, Deer Hunting Case 2026 ]
