Penamaluru MPTC Elections : రాజకీయాల్లో గెలుపోటములు సహజం.. కానీ కొన్ని విజయాలు మాత్రం ప్రజాస్వామ్యానికి కొత్త అర్థం చెబుతాయి. రాజకీయ నేపథ్యం లేదు.. కోట్ల రూపాయల ఆస్తులు లేవు.. ఎన్నికల ప్రచారానికి భారీ హంగామా లేదు. ఒకరు రిక్షా కార్మికుడు.. మరొకరు ఆటో డ్రైవర్. అలాంటి ఇద్దరు సామాన్యులు ఎన్నికల బరిలో దిగి విజయం సాధించడం ఇప్పుడు ఆంధ్రప్రదేశ్ ఆసక్తికర చర్చకు దారితీసింది.
రాజకీయాల్లోకి రావాలంటే పలుకుబడి ఉండాలి.. ఆర్థిక బలం ఉండాలి.. వెనుక పెద్ద నాయకుల అండదండలు ఉండాలి. ఎన్నికల్లో గెలవాలంటే కోట్ల రూపాయలు ఖర్చు చేయాలనే అభిప్రాయం చాలామందిలో ఉంది. కానీ కృష్ణా జిల్లా పెనమలూరులో వెలువడిన ఎంపీటీసీ ఎన్నికల ఫలితాలు ఈ అంచనాలకు భిన్నమైన సందేశాన్ని ఇచ్చాయి. ప్రజల్లో ఉంటూ, ప్రజల మధ్య జీవిస్తూ, వారి సమస్యలను దగ్గరగా చూస్తే సామాన్యులు కూడా రాజకీయాల్లో విజయాలు సాధించగలరని నిరూపించారు.
రిక్షానే ప్రచార రథం.. ప్రజలే అండగా!
పెనమలూరు-2 ఎంపీటీసీ స్థానం నుంచి టీడీపీ అభ్యర్థిగా పోటీ చేసిన శీలం ఆనంద్ విజయం ఇప్పుడు ప్రత్యేక ఆకర్షణగా మారింది. ఆయన వృత్తిరీత్యా రిక్షా కార్మికుడు. నిత్యం రిక్షా తొక్కుతూ కుటుంబాన్ని పోషించుకునే ఆనంద్.. ఎన్నికల సమయంలోనూ తన జీవనాధారమైన రిక్షనే ప్రచార వాహనంగా మార్చుకున్నారు. ఖరీదైన కార్లు, భారీ ప్రచార ర్యాలీలకు బదులుగా తన రిక్షాపైనే తిరుగుతూ ఓటర్లను కలుసుకున్నారు.
చివరకు ఓటర్లు ఆయనకు పట్టం కట్టారు. రిక్షా తొక్కే చేతులకు ఎంపీటీసీ బాధ్యతలు అప్పగించారు. ఇది కేవలం ఒక అభ్యర్థి మాత్రమే కాదు.. సామాన్యుడి ఆత్మవిశ్వాసానికి దక్కిన గుర్తింపుగా స్థానికంగా చర్చ జరుగుతోంది.
ఆటో డ్రైవర్‌కు ఎంపీపీ పీఠం దక్కేనా?
మరోవైపు పెనమలూరు-1 ఎంపీటీసీ స్థానం నుంచి టీడీపీ పోటీ చేసిన బాదావత్ వేంకటేశ్వరరావు కూడా ఆటో డ్రైవర్‌గా జీవనం సాగిస్తున్నారు. రోజూ ఆటో నడుపుతూ జీవించే ఆయన రాజకీయ ఎన్నికల్లో అదృష్టాన్ని పరీక్షించుకున్నారు. ప్రజల మద్దతుతో విజయం సాధించారు.
అయితే ఈ గెలుపుతో ఆయన రాజకీయ ప్రయాణం మరో మలుపు తిరిగే అవకాశాలు కనిపిస్తున్నాయి. రిజర్వేషన్లు, స్థానిక రాజకీయ సమీకరణల నేపథ్యంలో పెనమలూరు మండల పరిషత్ అధ్యక్షుడు (MPP) పదవికి ఆయన పేరు పరిశీలనలో ఉంది. అదే జరిగితే ఆటో నడిపిన వ్యక్తి మండల రాజకీయాలకు నాయకత్వం వహించే స్థాయికి ఎదిగినట్లవుతుంది.
పేర్ల విషయంలోనూ విచిత్రమైన యాదృచ్ఛికం!
ఈ రెండు ఎంపీటీసీ స్థానాల్లో మరో ఆసక్తికరమైన అంశం కూడా ఉంది. పెనమలూరు-1, పెనమలూరు-2 స్థానాల్లో గెలిచిన టీడీపీ అభ్యర్థుల పేర్లు ఆనంద్, వేంకటేశ్వరరావు కాగా, వారిపై పోటీ చేసి ఓడిపోయిన వైసీపీ అభ్యర్థుల పేర్లు కూడా అవే కావడం విశేషం. పేర్లు ఒక్కటే అయినా ప్రజల తీర్పు మాత్రం తప్పకుండా వచ్చింది. ఈ ఆసక్తికరమైన యాదృచ్ఛికం స్థానిక రాజకీయ వర్గాల్లో చర్చనీయాంశమైంది.
రాజకీయాలకు కొత్త సందేశమా?
ఈ విజయాలను కేవలం టీడీపీ ఖాతాలో చేరిన రెండు ఎంపీటీసీ స్థానాలుగా మాత్రమే చూడలేం. సామాజిక నేపథ్యం, ఆర్థిక స్థితిగతులు మాత్రమే విజయాన్ని నిర్ణయించవని ఈ ఫలితాలు మరోసారి గుర్తుచేస్తున్నాయి. సామాన్య ప్రజలతో నిరంతరం సంబంధాలు కలిగి ఉండటం, స్థానికంగా గుర్తింపు సంపాదించుకోవడం కూడా రాజకీయంగా ఎదుగుదలకు దారి తీస్తుంది.
అయితే ఈ విజయాల వెనుక స్థానిక రాజకీయ సమీకరణలు, పార్టీ బలం, అభ్యర్థుల వ్యక్తిగత పరిచయాలు కూడా కీలక పాత్ర పోషించి ఉండవచ్చు. తిరిగి రిక్షా కార్మికుడు, ఆటో డ్రైవర్ ఎన్నికల్లో గెలవడం సామాన్యుల్లో రాజకీయ ఆశలను పెంచే పరిణామం.
ఒకప్పుడు రిక్షా తొక్కిన చేతులు ఇప్పుడు ప్రజా సమస్యలపై గొంతెత్తబోతున్నాయి. రోజూ ఆటో నడిపిన వ్యక్తి రేపు మండల పరిషత్‌కు నాయకత్వం వహించే అవకాశం ఏర్పడింది. పదవులు వారసత్వంగా రావాల్సిన రాజకీయాల్లో అవసరం లేదు.. ప్రజల ఉంటే సామాన్యుడూ నాయకుడు కాకూడదని పెనమలూరు ఫలితాలు ఇచ్చిన సందేశం ఇదే!
