.WEBP)
టాలీవుడ్లో గత కొన్ని వారాలుగా తీవ్ర చర్చనీయాంశంగా మారిన ‘పర్సంటేజ్ సిస్టమ్’ వివాదం ఎట్టకేలకు ఒక కొలిక్కి వచ్చే సూచనలు కనిపిస్తున్నాయి. నైజాం (తెలంగాణ) ఫిల్మ్ ఛాంబర్ తాజాగా తీసుకున్న కొన్ని కీలక నిర్ణయాలు ఈ వివాదానికి ముగింపు పలికేలా అడుగులు వేస్తున్నాయి. టికెట్ ధరల పెంపుదల, థియేటర్ల కమీషన్ల చుట్టూ తిరుగుతున్న ఈ పంచాయితీపై ఇండస్ట్రీ వర్గాల్లో ప్రస్తుతం ఆసక్తికరమైన చర్చ నడుస్తోంది.
కొత్తగా వస్తున్న ప్రతిపాదనల ప్రకారం.. భవిష్యత్తులో సినిమాలకు అదనపు ధరల పెంపుదల లభిస్తే, ఆ పెరిగిన రేట్లపై థియేటర్ల యాజమాన్యాలకు 7.5 శాతం కమీషన్ ఇవ్వాల్సి ఉంటుంది. ఒకవేళ ప్రభుత్వాల నుంచి ఎలాంటి అదనపు రేట్ల పెంపుదలకు అనుమతి రాకపోతే, పాత పద్ధతిలోనే లావాదేవీలు కొనసాగుతాయి. ఈ మొత్తం వ్యవహారాన్ని పరిశీలించి, ఒక సమగ్ర పరిష్కారాన్ని సూచించడానికి ఏర్పాటు చేసిన ప్రత్యేక కమిటీ మరో నెల రోజుల్లో తన తుది నివేదికను సమర్పించనుంది.
మరోవైపు, ఆంధ్రప్రదేశ్ సినీ మార్కెట్లో ఈ పర్సంటేజ్ సమస్య ప్రభావం పెద్దగా కనిపించడం లేదు. ఏపీలో థియేటర్ల యాజమాన్యాలతో నిర్మాతల ఒప్పందాలు ఇప్పటికే దాదాపు ఒక కొలిక్కి వచ్చాయి. అక్కడ ఆటోపైలట్ మోడ్లో అనుమతులు లభిస్తున్నాయి ఎలాంటి గందరగోళం లేదు. అయితే, నైజాం ఎగ్జిబిటర్ల మధ్య ఉన్న అంతర్గత భేదాభిప్రాయాలను తొలగించి, ఒక స్పష్టమైన రోడ్ మ్యాప్ రూపొందించేందుకు ఎగ్జిబిషన్ రంగానికి చెందిన ముఖ్య పెద్దలు అత్యవసర సమావేశాన్ని నిర్వహించడం ప్రాధాన్యతను సంతరించుకుంది.
సాధారణంగా టాలీవుడ్లో పెద్ద హీరోల సినిమాలు, భారీ బడ్జెట్ చిత్రాలు విడుదలైనప్పుడు టికెట్ ధరల పెంపు అనేది సర్వసాధారణం అయిపోయింది. గతంలో రిలీజైన పలు పాన్ ఇండియా సినిమాలకు కూడా ప్రభుత్వాలు ప్రత్యేక జీవోల ద్వారా రేట్లు పెంచుకునే వెసులుబాటు కల్పించాయి. ఇప్పుడు రాబోయే పెద్ద సినిమాలకు కూడా ఇదే తరహా అదనపు ధరలు వర్తించే అవకాశం ఉంది, ఈ సరికొత్త పర్సంటేజ్ విధానం వల్ల అగ్ర నిర్మాతలు, డిస్ట్రిబ్యూటర్లకు ఎలాంటి ఇబ్బందులు వచ్చే అవకాశం లేదు.
కానీ, ఈ సరికొత్త పర్సంటేజ్ మోడల్ అమలులోకి వస్తే చిన్న సినిమాలు, చిన్న నిర్మాతల మనుగడ ప్రశ్నార్థకంగా మారుతుందనే ఆందోళనలు వ్యక్తమవుతున్నాయి. కొత్త నిబంధనల వల్ల థియేటర్ల యాజమాన్యాలు ఎక్కువ లాభాలు తెచ్చిపెట్టే పెద్ద సినిమాల వైపే మొగ్గు చూపు, దీనివల్ల మంచి కంటెంట్ ఉన్న చిన్న చిత్రాలకు థియేటర్లు దొరకడం గగనంగా మారుతుందని సోషల్ మీడియాలో నెటిజన్లు, సినీ విశ్లేషకులు హెచ్చరిస్తున్నారు.
ఇండస్ట్రీలోని పెద్ద తలకాయలు తమ వ్యాపార సమీకరణలను చక్కబెట్టుకుంటున్న ఈ తరుణంలో, సామాన్య ప్రేక్షకుల జేబులకు చిల్లు పడకుండా ఉండాలని సగటు సినిమా అభిమాని కోరుకుంటున్నారు. త్వరలో రాబోయే ప్రత్యేక కమిటీ నివేదిక చిన్న సినిమాల భవిష్యత్తును, ప్రేక్షకుల ప్రయోజనాలను ఏ మేరకు కాపాడుతుందో చూడాలి.
