అసిమ్ మునీర్ ఇప్పుడు పాకిస్తాన్ సైన్యాధిపతి మాత్రమే కాదు.. అమెరికా, ఇరాన్ మధ్య చర్చలకు తెరవెనుక కీలక మధ్యవర్తి కూడా. కానీ అదే పాత్ర, వాషింగ్టన్ దృష్టిలో.. ఆయనను విలువైన ఆస్తిగా కాకుండా ప్రమాద సూచికగా కూడా మారుస్తోంది. ఇది ఒక వ్యక్తి గురించి మాత్రమే కాదు. ఇది అమెరికా విదేశాంగ ఇలా ఎలా వ్యక్తిగత సంబంధాలపై.. రహస్య మార్గాలపై.. తాత్కాలిక ఒప్పందాలపై ఆధారపడుతోందన్న ప్రశ్న.
దౌత్యం కాదు, డ్యామేజ్ కంట్రోల్
ట్రంప్ పరిపాలనకు మునీర్ తో ఉన్న సాన్నిహిత్యం కొత్తది కాదు. కానీ ఇప్పుడు ఆ సాన్నిహిత్యం ఒక వ్యూహాత్మక పరీక్షగా మారింది. ఒకవైపు ఇరాన్ తో పరోక్ష చర్చలు సాగుతున్నాయి. మరోవైపు , మునీర్ కు టెహ్రాన్ అగ్ర సైనిక వర్గాలతో సంబంధాలు ఉన్నాయన్న ఆందోళనలు పెరుగుతున్నాయి. ఇక్కడ సమస్య మునీర్ మాట్లాడుతున్నారా లేదా అన్నది కాదు. ఆయన ఎవరి కోసం, ఎంత పారదర్శకంగా, ఎంత నమ్మదగిన రీతిలో మాట్లాడుతున్నారన్నదే అసలు ప్రశ్న. అమెరికా నిఘా వర్గాలు హెచ్చరిస్తున్నది కూడా ఇదే. మధ్యవర్తి అనే ముసుగులో వ్యూహాత్మక చీలికలు తెచ్చే అవకాశం ఉంది.
పాకిస్థాన్ పాత రికార్డు మర్చిపోలేం
పాకిస్తాన్ ను అనివార్య భాగస్వామిగా వాషింగ్టన్ ఎన్నిసార్లు చూసినా.. అదే దేశం ఎన్నిసార్లు తన స్వప్రయోజనాల కోసం ఆట మార్గం మార్చిందో చరిత్ర గుర్తు చేస్తోంది. ఆఫ్ఘనిస్తాన్ లో తాలిబాన్ లకు ఇచ్చిన మద్దతు.. అమెరికా సహాయాన్ని పొందుతూ రెండు వైపులా ఆడిన విధానం, ఇవన్నీ అమెరికా విశ్వాసాన్ని బలహీనపరిచేవే.
అందుకే మునీర్ పై ఆధారపడటం కేవలం దౌత్యం కాదు.. అది జియోపాలిటికల్ జూదం. ఒక చేత్తో శాంతి ఒప్పందం, మరో చేత్తో నిఘా అపోహలు.. ఈ కలయిక అమెరికాకు తాత్కాలిక లాభం ఇవ్వవచ్చు, కానీ దీర్ఘకాలంలో ఖర్చు భారీగా ఉండొచ్చు.
వాన్స్ ఎందుకు వెనక్కి తగ్గారు?
జేడీ వాన్స్ పాకిస్థాన్ పర్యటన నుంచి తప్పుకోవడం చిన్న విషయం కాదు. భద్రతా కారణాలు మాత్రమే అని చెబుతున్నా, దాని వెనుక చర్చల సున్నితత్వం, విశ్వాస లోపం, వేదికపై ఉన్న అనిశ్చితి స్పష్టంగా కనిపిస్తున్నాయి. అత్యున్నత స్థాయి నేతను పక్కకు పెట్టి, స్టీవ్ విట్కాఫ్, జారెడ్ కుష్నర్ వంటి ట్రంప్ కు అత్యంత సన్నిహితులపై ఆధారపడటం ఒక సంకేతం.. ఈ చర్చలు సాంప్రదాయ దౌత్యం కాదు, వ్యక్తిగత ప్రభావం ఆధారితం. అలాంటి సందర్భాల్లో ఒక్క తప్పు అంచనా కూడా పెద్ద భౌగోళిక రాజకీయ ధరను తెచ్చిపెడుతుంది.
ట్రంప్ శైలి, వ్యూహాత్మక ప్రమాదం
ట్రంప్ ఎప్పుడూ డీల్ ఫస్ట్ నాయకుడే. ఆయనకు మిత్రులు, శత్రువులు కాదు.. ఉపయోగపడేవారు, ఉపయోగపడనివారు మాత్రమే ఉంటారు. మునీర్ ఆ కోవలో ఉపయోగపడే వ్యక్తిగా ట్రంప్ కు కనిపించి ఉండొచ్చు. కానీ అమెరికా జాతీయ భద్రతా యంత్రాంగానికి అటువంటి వ్యక్తిగత విశ్వాసం సరిపోదు.
దౌత్యం కేవలం ఫోన్ కాల్స్ తో, వ్యక్తిగత ప్రశంసలతో, లేదా ఫేవరెట్ ఫీల్డ్ మార్షల్ వంటి పదాలతో నడవదు. అది కచ్చితమైన పారదర్శకత, ప్రయోజనాల స్పష్టత, విశ్వసనీయతపై నిలబడాలి. మునీర్ విషయంలో అన్నీ ప్రశ్నార్థకంగా ఉన్నప్పుడు, ఆయనను వంతెనగా కాదు, భద్రతా లోపంగా చూడడం సహజమే.
అమెరికాకు ఇప్పుడే పాఠం అవసరం
ఇక్కడ పెద్దది ఇదే.. మధ్యవర్తులను నిజం చేయడం సులభం.. కానీ వారిని నియంత్రించడం కష్టం. అమెరికా, ఇరాన్ చర్చల్లో పాకిస్థాన్ ను ఉపయోగించుకోవాలన్న ఆలోచన తాత్కాలికంగా మంచిగా కనిపించవచ్చు. కానీ పాకిస్థాన్ గతం, మునీర్ నెట్ వర్క్ ప్రాంతీయ అస్పష్టతలు ఈ వ్యూహాన్ని బలహీనపరుస్తున్నాయి. శాంతి ఒప్పందాల కోసం భద్రతా ఆందోళనలే ప్రధాన సమస్యగా మారితే.. ఆ దౌత్యం ఇప్పటికే సున్నితంగా ఉందని అర్థం. వాషింగ్టన్ దీనిని ఇప్పుడే గుర్తించకపోతే, అది పెద్ద మూల్యం చెల్లించాల్సి వస్తుంది.
చివరి మాట
మునీర్ ను ట్రంప్ ఎంతగా నమ్మినా.. అమెరికా నిఘా వ్యవస్థకు నమ్మకం లేదు.. అప్రమత్తతే ముఖ్యం. మధ్యవర్తిత్వం పేరుతో వేషం వేసుకున్న ప్రభావం, చివరికి అమెరికా ప్రయోజనాలకే ముప్పు తెస్తే? అదే అసలు ప్రశ్న. అమెరికాకు కావలసింది మరొక ఫేవరెట్ ఫీల్డ్ మార్షల్ కాదు. కావలసింది నమ్మదగిన విధానం. అదే ఇప్పుడు అత్యంత తక్కువగా ఉంది.
సూచనలు:
https://www.foxnews.com/world/trumps-favorite-field-marshal-who-pakistans-powerful-army-chief-asim-munir-deep-intel-ties
https://www.nytimes.com/2026/04/08/world/middleeast/pakistan-iran-us-ceasefire-talks.html
https://www.indiatoday.in/world/story/general-asim-munirs-reported-iran-ties-a-red-flag-for-us-intel-report-2898370-2026-04-19
https://www.youtube.com/watch?v=NCGCJ7ohwBU
https://www.youtube.com/watch?v=FKfSG53Nr4U
https://www.timesofisrael.com/liveblog_entry/trump-says-vance-not-going-to-pakistan-for-iran-talks-due-to-security-concerns/
https://www.ndtv.com/world-news/donald-trump-praises-pakistans-shehbaz-sharif-asim-munir-after-us-iran-talks-calls-them-very-extraordinary-men-11348910
https://www.instagram.com/p/DXUUdrDk6-K/
https://www.youtube.com/watch?v=9ndoQNY43Fs
-సీతారాం కంఠంనేని
