విశాఖపట్నంలో వైభవంగా జరుగుతున్న సీఐఐ సదస్సు కేవలం పారిశ్రామిక ఒప్పందాలకే కాకుండా, ప్రముఖుల ఆసక్తికర సంభాషణలకు కూడా వేదికగా నిలిచింది. ఈ వేదికపై ఆంధ్రప్రదేశ్ మంత్రి నారా లోకేష్, ప్రముఖ వ్యాపారవేత్త, అపోలో హాస్పిటల్స్ వైస్ ఛైర్‌పర్సన్ ఉపాసన కామినేని మధ్య జరిగిన ప్రత్యేక ముచ్చట ప్రస్తుతం సోషల్ మీడియాలో హాట్ టాపిక్‌గా మారింది.
ఇరువురు ప్రముఖులు తమ కుటుంబాల దిగ్గజాల లెగసీలను గుర్తుచేసుకుంటూ వ్యాపారం, రాజకీయంగా అందరి దృష్టిని ఆకర్షించింది.ఈ సందర్భంగా ఉపాసన మాట్లాడుతూ ఇరు కుటుంబాల గొప్ప నేపథ్యాన్ని ప్రస్తావించారు. దివంగత నందమూరి తారకరామారావు తెలుగు జాతికి ఆత్మగౌరవాన్ని నేర్పితే, తన తాత డాక్టర్ ప్రతాప్ సి. రెడ్డి వైద్య రంగంలో విప్లవాత్మక మార్పులు తెచ్చి ప్రజల ప్రాణాలను కాపాడారని గుర్తుచేశారు.
ఈ మహానుభావులు ఆంధ్రా ప్రాంతం నుంచే తమ ప్రయాణాన్ని ప్రారంభించి దేశంలో ఇద్దరు చెరగని ముద్రణ వేయడం గర్వకారణమని ఆమె పేర్కొన్నారు.రాష్ట్రంలో గత పదహారు నెలల కాలంలో పరిశ్రమల అభివృద్ధికి, భారీ పెట్టుబడుల ఆకర్షణకు నారా లోకేష్ చేస్తున్న విశేష కృషిని ఉపాసన ప్రశంసించారు.
ప్రభుత్వ విధానాలు, యువతకు ఉపాధి కల్పన దిశగా ఆయన చూపుతున్న చొరవను అభినందిస్తూ లోకేష్‌ను ‘రాక్ స్టార్ మంత్రి’గా అభివర్ణించారు. యువ నాయకుడిగా ఆయన వేస్తున్న అడుగులు పారిశ్రామిక వర్గాల్లో జోరు పెంచుతున్నాయని కొనియాడారు. మరోవైపు ఉపాసన వ్యాపార రంగంలో దూసుకుపోతుండటాన్ని, అపోలో గ్రూప్ బాధ్యతలను సమర్థవంతంగా నిర్వహిస్తూ తన తాతగారి ఆశయాలను ముందుకు తీసుకువెళ్తుండటాన్ని మంత్రి లోకేష్ అభినందించారు.
ఇది కూడా చదవండి: 1999లోనే చంద్రబాబు ముందుచూపు.. నేడు రూ.75 వేల కోట్ల ఆదాయం: గ్రంథి మల్లికార్జున రావు
ఆరోగ్య రక్షణ రంగం ఎదుర్కొంటున్న సవాళ్లు, భవిష్యత్తులో వైద్య రంగానికి ఉండాల్సిన ప్రాధాన్యత గురించి ఇరువురి మధ్య విశ్లేషణాత్మక చర్చ సాగింది. మారుతున్న జీవనశైలి వ్యాధుల నియంత్రణకు తీసుకోవాల్సిన ముందస్తు జాగ్రత్తలపై కూడా వారు అభిప్రాయాలు పంచుకున్నారు.సవాళ్లను అవకాశాలుగా మలచుకుంటూ నవ్యాంధ్ర ప్రదేశ్‌ను పునర్నిర్మించడమే లక్ష్యంగా ప్రభుత్వం పనిచేస్తోందని లోకేష్ వివరించారు.
చారిత్రక నేపథ్యం ఉన్న విశాఖ గడ్డపై జరిగిన ఈ భేటీలో యువ పారిశ్రామికవేత్తలు, రాజకీయ ప్రముఖుల కలయిక రాష్ట్ర భవిష్యత్తుపై సానుకూల దృక్పథాన్ని చాటిచెప్పింది. భవిష్యత్తులో మరిన్ని కీలక రంగాల్లో పెట్టుబడులు రావడం ద్వారా ఏపీ దేశంలోనే అగ్రగామిగా నిలుస్తున్న ఆశాభావాన్ని ఈ సదస్సు వ్యక్తపరుస్తోంది.
మీకు నచ్చవచ్చు: సాంకేతిక విప్లవం నుంచి అమరావతి క్వాంటమ్ హబ్ వరకు.. సీఎం చంద్రబాబు భవిష్యత్తు విజన్.!
మీకు నచ్చవచ్చు: సీఐఐ సదస్సు: తొలి రోజు ఎమ్మెల్యేల విలువేంటో తెలుసా.?
[ CII Summit Visakha, Minister Nara Lokesh, Upasana Kamineni, AP Investments, CM Chandrababu]
