ఆమెకు ఏం కష్టం వచ్చిందో తెలియదు.. పండగ మురిపెం తీరకముందే ప్రాణాలు నిలుపుకుంది. గుండె ధైర్యం చేసి వాగులోకి దూరింది. కానీ చావు పుట్టుకలు మన చేతుల్లో ఉండవు కదా.. ఆమెకు భూమి మీద ఇంకా నూకలున్నట్లున్నాయి. చనిపోదామనుకున్న మహిళను స్వయంగా దుర్గా మాటే కాపాడింది. ఆమెను క్షేమంగా బయటకు చేర్చింది.
జీవితంపై విరక్తి చెంది వాగులోకి దూకి చనిపోవాలని భావించిన ఆ మహిళ.. ఇప్పటికే నిమజ్జనం చేసిన దుర్గామాత విగ్రహం స్టాండ్ చేతికి చిక్కడంతో నిండు ప్రాణం నిలిచింది. స్థానికులు, పోలీసుల సమయస్ఫూర్తితో ఆమెను సురక్షితంగా బయటకు తీసుకురావడంతో కథనం అయ్యింది. ఇంతకు ఈ సంఘటన ఎక్కడ జరిగిందంటే..
సిద్దిపేట జిల్లా వర్గల్ మండలం నాచారంగుట్ట పరిధిలోని హల్దీ వాగు చెక్‌డ్యామ్‌లో గురువారం ఈ ఘటన వెలుగు చూసింది. గజ్వేల్ మండలం ప్రజ్ఞాపూర్‌కు చెందిన చీర్ల బాలమణి (50) అనే మహిళ ప్రస్తుతం తీవ్ర మానసిక ఆరోగ్య సమస్యలతో బాధపడుతోంది. ఈ కోరిక మనస్తాపానికి గురైన ఆమె ప్రాణాలు తీసుకోవాలనే నిర్ణయంతో హల్దీ వాగు నీటిలోకి దూకింది.
అయితే, వాగులో మునిగిపోతున్న సమయంలో ఆమె బతుకు మీద ఆశ కలిగింది. ఆమె సంకల్పం గొప్పది కనుక.. నీటిలో ముగిసి చనిపోవాల్సిన మహిళకు.. నీటి అడుగున ఉన్న దుర్గామాత విగ్రహం స్టాండ్ అనుకోకుండా చేతికి తగిలింది. ఏమీ ఆలస్యం చేయకుండా ఆ స్టాండ్‌ను ఆమె గట్టిగా పట్టుకుంది. అది ఆసరగా మారడంతో నీటిపై తేలియాడుతూ ప్రాణాపాయం నుంచి బయటపడింది.
వాగులో ఒక మహిళ తేలియాడుతుండటాన్ని గమనించిన స్థానికులు వెంటనే సమీపంలోని చెక్‌పోస్ట్‌లో విధుల్లో ఉన్న కానిస్టేబుల్ విష్ణుకు సమాచారం ఇచ్చారు. సమాచారం అందుకున్న వెంటనే కానిస్టేబుల్ విష్ణు స్థానికులను వెంటబెట్టుకుని సంఘటనా స్థలానికి చేరుకున్నారు. చాకచక్యంగా వ్యవహరించి బాలమణిని సురక్షితంగా ఒడ్డుకు చేర్చారు.
సమాచారం అందుకున్న ఆమె కుమారుడు, అల్లుడు అక్కడికి చేరుకుని ఆమెను తమ నివాసానికి తీసుకెళ్లారు. ఆపద సమయంలో ప్రాణాలకు తెగించి సకాలంలో స్పందించిన కానిస్టేబుల్ విష్ణును, స్థానికులను గ్రామస్థులు విశేషంగా కొనియాడారు.
ధరణి
