.WEBP)
– బాక్సాఫీస్ వద్ద చరిత్రాత్మక కథల జాతర!
– పిరియాడిక్ డ్రామాలతో సరికొత్త ప్రయోగం!
– టాలీవుడ్లో సరికొత్త ట్రెండ్ ఇదే!
టాలీవుడ్ వెండితెరపై ఇప్పుడు చరిత్ర పులకించబోతోంది. ఒకప్పుడు కేవలం కమర్షియల్ ఫార్ములా సినిమాలు, లవ్ స్టోరీలకే పరిమితమైన మన హీరోలు, ఇప్పుడు రూట్ మారుస్తున్నారు. ప్రేక్షకులకు సరికొత్త అనుభూతిని అందించడమే లక్ష్యంగా, పాత కాలం నాటి జ్ఞాపకాలను, వీరగాథలను ప్రదర్శించడానికి సిద్ధమవుతున్నారు. ప్రస్తుతం టాలీవుడ్లో ఎక్కడ చూసినా పీరియాడిక్ మరియు హిస్టారికల్ చిత్రాల ముచ్చట్లే వినిపిస్తున్నాయి.
పాన్ ఇండియా స్టార్ ప్రభాస్ ప్రస్తుతం ‘సీతారామం’ ఫేమ్ హను రాఘవపూడి దర్శకత్వంలో ‘ఫౌజీ’ (వర్కింగ్ టైటిల్) అనే చిత్రంలో నటిస్తున్నారు. ఇది రెండవ ప్రపంచ యుద్ధం నాటి నేపథ్యంలో సాగే పిరియాడిక్ యాక్షన్ డ్రామా. అద్భుతమైన విజువల్స్, ఎమోషనల్ వార్ డ్రామాగా రూపొందించిన ఈ సినిమాపై అంచనాలు ఆకాశాన్ని తాకుతున్నాయి. రాజసం ఉట్టిపడే ప్రభాస్ లుక్ ఇప్పటికే సోషల్ మీడియాలో వైరల్ అవుతోంది.
మరోవైపు, వైవిధ్యమైన కథలను ప్రదర్శించడంలో ముందుండే రౌడీ హీరో విజయ్ దేవరకొండ కూడా ఇదే బాటలో పయనిస్తున్నారు. రవికిరణ్ కోల దర్శకత్వంలో ‘రణబాలి’ అనే ప్రతిష్టాత్మక చిత్రం రూపొందుతోంది. 19వ శతాబ్దంలో, అంటే 1854-1878 మధ్య కాలంలో బ్రిటిష్ పరిపాలనపై సాగిన పోరాటాల నేపథ్యంలో ఈ సినిమాను తెరకెక్కిస్తున్నారు. అప్పట్లో మన ప్రాంతాల్లో జరిగిన యదార్థ సంఘటనల ఆధారంగా ఈ కథను అద్భుతంగా మలిచినట్లు సమాచారం.
యువ హీరో నిఖిల్ సిద్ధార్థ్ కూడా తన కెరీర్ను పీరియాడిక్ సినిమాలతో నెక్ట్స్ లెవల్కు తీస్తున్నారు. ఆయన నటిస్తున్న ‘స్వయంభు’ సినిమా 7వ శతాబ్దపు నాటి యోధుల కథను కళ్లకు కట్టనుంది. నిఖిల్ కఠినమైన శిక్షణ కూడా తీసుకున్నారు. దీనితో పాటు స్వాతంత్య్ర’ ఉద్యమ కాలం నాటి కథాంశంతో ‘ద ఇండియా హౌస్’ అనే మరో భారీ ప్రాజెక్టును కూడా ఆయన పట్టాలెక్కించారు. ఈ రెండు సినిమాలు నిఖిల్ మార్కెట్ను పాన్ ఇండియా స్థాయిలో పెంచుతాయనడంలో సందేహం లేదు.
యాక్షన్ హీరో గోపిచంద్ కూడా ఈ చరిత్రాత్మక రేసులో భాగమయ్యారు. ప్రయోగాత్మక దర్శకుడు సంకల్ప్ రెడ్డితో కలిసి ‘భరతవర్ష’ అనే ప్రాజెక్టును అనౌన్స్ చేశారు. ఇది కూడా 7వ శతాబ్దపు కాలమాన పరిస్థితులను ప్రతిబింబించేలా, హై ఎండ్ విజువల్ ఎఫెక్ట్స్తో రూపుదిద్దుకుంటోంది. గోపిచంద్ కెరీర్లోనే ఇది అత్యంత భారీ బడ్జెట్ చిత్రంగా నిలవనుంది.
గతంలో ‘బాహుబలి’, ‘RRR’ వంటి చిత్రాలు సాధించిన ఘనవిజయం, మన హీరోలలో ఈ తరహా కథలపై నమ్మకాన్ని పెంచింది. ప్రేక్షకులు కూడా రొటీన్ కథల కంటే, భారీ సెట్లు, చరిత్రాత్మక నేపథ్యం ఉన్న సినిమాలకే పట్టం కడుతున్నారు. దీనితో టాలీవుడ్ అగ్ర హీరోల నుండి యంగ్ హీరోల వరకు అందరూ పాత కాలం నాటి వైభవాన్ని వెండితెరపై పునఃసృష్టి కోసం పోటీ పడుతున్నారు.
రాబోయే రోజుల్లో థియేటర్లలో ఈ పీరియాడిక్ డ్రామాలు ఎలాంటి సంచలనాలు సృష్టిస్తాయో చూడాలి. ఈ సినిమాలన్నీ ఒకదానికొకటి భిన్నమైన కాలానికి చెందినవి కావడంతో, ప్రేక్షకులకు ఒక అద్భుతమైన సినీ ప్రయాణాన్ని ఆస్వాదించే అవకాశం లభిస్తుంది. ముఖ్యంగా ప్రభాస్ ‘ఫౌజీ’, విజయ్ ‘రణబాలి’ వంటి చిత్రాలు బాక్సాఫీస్ వద్ద సరికొత్త రికార్డులను సృష్టించడం ఖాయమని సినీ విశ్లేషకులు అభిప్రాయపడుతున్నారు.
