అనంత్ సేవా ఫౌండేషన్ : కలలున్నాయి.. కానీ వాటిని నిజం చేసుకునే స్థోమత లేదు. కష్టపడాలనే తపన ఉంది.. కానీ ఆ కష్టాన్ని మరింత సులభం చేసే వాహనం కొనుక్కునే ఆర్థిక పరిస్థితి లేదు. అయినా వెనకడుగు వేయకుండా సైకిల్‌పైనే ఇంటింటికీ తిరుగుతూ కుటుంబం కోసం శ్రమిస్తున్న ఓ డెలివరీ కార్మికుడికి అనుకోని కానుక లభించింది. ఆ బహుమతి అతడి కళ్లలో ఆనందభాష్పాలు నింపింది. ఆ కన్నీళ్ల వెనుక ఉన్నది కేవలం ఒక స్కూటర్ ఆనందం కాదు.. తన కష్టాన్ని ఎవరో గుర్తించే భావోద్వేగం!
జీవితంలో కొన్నిసార్లు చిన్న సాయం కూడా ఎంతో పెద్ద ఆశను నింపుతుంది. మనకు సాధారణంగా కనిపించే ఒక వస్తువు.. మరొకరి జీవితంలో మాత్రం ఓ పెద్ద కల కావచ్చు. అలాంటి హృదయాన్ని కదిలించే ఘటన ముంబయిలో జరిగింది. ఓ డెలివరీ ఏజెంట్‌కు ఎలక్ట్రిక్ స్కూటర్‌ను బహుమతిగా అందించిన అనంత్ అంబానీ ఉదారత ఇప్పుడు సోషల్ మీడియాలో చర్చనీయాంశంగా మారింది.
సైకిల్‌పైనే జీవన పోరాటం..
ముంబయికి చెందిన సుజీత్ అనే వ్యక్తి డెలివరీ ఏజెంట్‌గా పనిచేస్తున్నారు. రోజంతా ఆర్డర్లు అందిస్తూ, ఒక ఇంటి నుంచి మరో ఇంటికి తిరుగుతూ జీవనాన్ని సాగిస్తున్నారు. ఈ పని చేయడానికి బైక్ ఉంటే ఎంతో ఆనందంగా ఉంటుంది. ఎక్కువ డెలివరీలు చేయొచ్చు.. సమయం ఆదా అవుతుంది.. శారీరక శ్రమ కూడా కొంత తగ్గుతుంది. కానీ బైక్ కొనుకోవాలంటే డబ్బులు కావాలి. పెరుగుతున్న నిత్యావసరాల ధరలు, చాలీచాలని ఆదాయం మధ్య ఆ కలను నెరవేర్చుకోవడం సుజిత్‌కు సాధ్యం కాలేదు.
అందుకే బైక్ లేకపోయినా సైకిల్‌పైనే తన పని కొనసాగిస్తున్నారు. ఎండైనా, అలసటైనా, ఆర్థిక ఇబ్బందులైనా కుటుంబం కోసం ముందుకు సాగుతోంది. ప్రతిరోజూ ఆయన చేసే ఈ ప్రయాణం వెనుక ఎన్నో ఆశలు, మరెన్నో బాధ్యతలు దాగి ఉన్నాయి.
ఓ ప్రశ్న.. మారిపోయిన క్షణం!
ఓ రోజు సుజీత్ సైకిల్‌పై డెలివరీ విధులకు వెళ్తుండగా ముంబయికి చెందిన ఇన్‌ఫ్లుయెన్సర్‌ హుస్సేన్‌ మన్సూరి ఆయనను పలకరించారు. బైక్ ఎందుకు కొనుక్కోలేదని అడిగారు. అందుకు సుజిత్ చెప్పిన సమాధానం ఆయన ఆర్థిక పరిస్థితిని అద్దం పట్టింది. వచ్చే ఆదాయంతో కుటుంబ అవసరాలు తీర్చడం కష్టమవుతోందని, బైక్ కొనుగోలు చేసే స్థోమత లేదని వివరించారు.
ఆ మాటల్లో పేదరికం ఉంది. నిస్సహాయత ఉంది. అదే సమయంలో పరిస్థితులకు తలవంచకుండా పనిచేయాలంటే పట్టుదల కూడా ఉంది.
అయితే, సుజీత్ జీవితంలో అంతకుముందెన్నడూ ఊహించని ఓ క్షణం ఎదురుకాబోతోంది. హుస్సేన్‌ మన్సూరి ఆయనకు ఓ సర్‌ప్రైజ్‌ ఇస్తానని చెప్పి, డెలివరీ పూర్తి చేసి తిరిగి రావాలని సూచించారు.
స్కూటర్‌ను చూసి కన్నీళ్లు పెట్టుకున్నాడు!
డెలివరీ ముగించుకుని తిరిగి వచ్చిన సుజిత్ కళ్లకు గంతలు కట్టి, ఆయన ముందు ఓ కొత్త ఎలక్ట్రిక్ స్కూటర్‌ను ఉంచారు. అనంత్ అంబనీ తరపున ఈ చిన్న బహుమతిని అందించారు.
కళ్లకు కట్టిన గంటలు తొలగించి తన ముందు ఉన్న స్కూటర్‌ను చూసిన సుజిత్ ఆనందానికి అవధుల్లేకుండా పోయాయి. తన జీవితంలో ఇలాంటి కానుక లభిస్తుందని ఆయన ఊహించి ఉండకపోవచ్చు. మాటలు రాలేదు.. భావోద్వేగాన్ని ఆపుకోలేకపోయారు. హుస్సేన్‌ మన్సూరిని హత్తుకుని కన్నీళ్లు పెట్టుకున్నారు.
ఆ కన్నీళ్లు కేవలం ఆనందానికి గుర్తులు మాత్రమే కాదు. రోజూ సైకిల్‌పై పడిన శ్రమకు లభించిన గుర్తింపు కావచ్చు. తన సమస్యను ఎవరో అర్థం చేసుకున్నారనే సంతోషం కావచ్చు. ఇకపై కొంత సులభంగా పని చేసుకోగలననే ఆశ కావచ్చు.
బహుమతి కంటే పెద్దది.. ఆప్యాయత!
అనంత్ అంబానీ ఈ స్కూటర్‌ను అందించినట్లు తెలిపిన ఈ ఘటనకు సంబంధించిన వీడియోను హుస్సేన్‌ మన్సూరి ఇన్‌స్టాగ్రామ్‌లో పోస్ట్ చేశారు. ఆ వీడియో సామాజిక మాధ్యమాల్లో వైరల్‌గా మారింది. ‘అనంత్ సేవా ఫౌండేషన్’ కార్యక్రమంలో భాగంగా ఈ బహుమతిని అందించినట్లు జాతీయ మీడియాలో కథనాలు వచ్చాయి.
నిజానికి ఒక స్కూటర్ ఇవ్వడం అనేది బయటకు చూస్తే చిన్న విషయంగానే అనిపించవచ్చు. కానీ రోజంతా సైకిల్‌పై తిరుగుతూ జీవనోపాధి పొందే వ్యక్తికి అది ఎంతో విలువైన కానుక. పని సులభం కావడానికి, సమయం ఆదా చేయడానికి, మరింత ఆత్మవిశ్వాసంతో ముందుకు సాగడానికి అది తోడ్పడవచ్చు.
సమాజంలో చాలామంది కష్టపడుతున్నారు. తమ బాధలను బయటకు చెప్పుకోలేక, తమ అవసరాలను తీర్చుకోలేక నిశ్శబ్దంగా పోరాడుతున్నారు. అలాంటి వారి జీవితాల్లో చిన్న సహాయం కూడా పెద్ద మార్పుకు నాంది కావచ్చు.
సుజిత్ కళ్లలో కనిపించిన ఆనందం మనకు చెప్పేది ఒక్కటే.. సాయం విలువ దాని ధరలో ఉండదు.. అది మనోధైర్యంలో ఉంటుంది.
ఒకరికి బహుమతిగా ఇచ్చిన స్కూటర్.. మరొకరికి తన కష్టాన్ని గుర్తించిన సమాజంపై నమ్మకాన్ని కలిగించింది. అందుకే ఈ ఘటనలో ప్రత్యేకంగా నిలిచిన స్కూటర్ కాదు.. ఆ స్కూటర్‌ను చూసి కన్నీళ్లు పెట్టుకున్న ఓ సాధారణ కార్మికుడి మనసు.
మనిషికి సాయం చేయడానికి సంపద ఒక్కటే సరిపోదు.. ఎదుటివారి కష్టాన్ని గుర్తించే మనసు కూడా ఉండాలి. ఆ మనసుతో చేసే చిన్న సాయం.. ఒకరి జీవితంలో ఎప్పటికీ మరిచిపోలేని మధుర జ్ఞాపకంగా మిగిలిపోతుంది.
