.WEBP)
తెలుగు సినిమా అంటే ఒకప్పుడు కథలు, పాత్రలు. కానీ కాలక్రమేణా అది ‘హీరో’ చుట్టూ తిరిగే ఒక భారీ సామ్రాజ్యంగా మారిపోయింది. ప్రస్తుతం టాలీవుడ్లో ఎక్కడ చూసిన హీరోల రెమ్యునరేషన్లు, ప్రొడక్షన్ బడ్జెట్ గురించి చర్చ. “ఈ హీరో-సెంట్రిక్ వ్యవస్థ ఒక్క రోజులో ఏర్పడిందా?” అంటే.. ఖచ్చితంగా కాదు. ఇది దశాబ్దాల కాలంగా నిర్మితమైన ఒక పటిష్టమైన వ్యాపార నమూనా.
90వ దశకంలో చిరంజీవి, బాలకృష్ణ, నాగార్జున, వెంకటేష్ వంటి స్టార్ హీరోలు బాక్సాఫీస్ వద్ద సృష్టించిన ప్రభంజనం అసాధారణం. అప్పట్లో ఒక సాధారణ సినిమా రూ. 1–2 కోట్లు వసూలు చేయడమే గగనంగా ఉండేది. కానీ, ఈ స్టార్ హీరోల సినిమాలు ఏకంగా రూ. 20 కోట్లకు పైగా వసూళ్లు సాధించి ఇండస్ట్రీ లెక్కలను మార్చేశాయి. నిర్మాతలకు “హీరో ఉంటేనే భారీ లాభాలు” అనే నమ్మకం అప్పుడే బలపడింది. ఫలితంగా, కథ కంటే హీరో ఇమేజ్కు ప్రాధాన్యత పెరిగింది.
2000వ దశకం వచ్చేసరికి, సినిమా అనేది కేవలం కళ మాత్రమే కాదు, ఒక హై-రిస్క్ బిజినెస్గా మారింది. కథలో బలం లేకపోయినా, హీరో పేరు మీద థియేటర్లకు వచ్చే ప్రేక్షకుల సంఖ్య పెరిగింది. వీటిని పంపిణీదారులు కూడా ‘పేరు’ చూసి కోట్లు కుమ్మరించడం మొదలుపెట్టారు. హీరోల చుట్టూ ఫ్యాన్ బేస్ పెరగడం, మాస్ మసాలా ఫార్ములాలు హిట్ అవ్వడం ఈ వ్యవస్థను మరింత స్ట్రాంగ్ చేశాయి.
డిజిటల్ విప్లవం తర్వాత ప్రేక్షకులు అభిరుచి మారుతుందని అందరూ భావించారు. కానీ, క్షేత్రస్థాయిలో పరిస్థితి లేదు. ది టాప్ (OTT) వేదికలు చిన్న సినిమాలకు అండగా నిలుస్తున్నప్పటికీ, పెద్ద సినిమాల రికవరీకి అవే ప్రధాన వనరుగా మారాయి. స్టార్ హీరో సినిమా అంటే OTT సంస్థలు కూడా భారీ ధరకు కొనుగోలు చేస్తున్నాయి. అంటే, టెక్నాలజీ మారినా ‘హీరో ఫ్యాక్టర్’ మాత్రం అలాగే ఉండిపోయింది.
ప్రస్తుతం వినిపిస్తున్న ప్రధాన వాదన ఏంటంటే “ఒక రోజులో వచ్చింది ఒక రోజులో పోదు”. ఈ హీరో సెంట్రిక్ వ్యవస్థను మార్చడం అంత సులభం కాదు. ఎందుకంటే స్టార్ హీరో ఉంటేనే ఫైనాన్షియర్స్ ముందుకు వస్తున్నారు. రాజమౌళి వంటి గ్లోబల్ గుర్తింపు తెచ్చేందుకు దర్శకులు, పాన్ఇండియా మార్కెట్లో నిలబడాలంటే ఇంకా స్టార్ పవర్ అవసరం.
టాలీవుడ్ హీరో సెంట్రిక్ ఇండస్ట్రీ ఒక బలమైన భావోద్వేగం మరియు వ్యాపారపు పునాదిపై ఉంది. అయితే, రాబోయే రోజుల్లో బడ్జెట్లు అదుపు తప్పితే లేదా ప్రేక్షకులు కేవలం ‘పేరు’ను చూసి మోసపోవడానికి సిద్ధంగా లేకుంటే, తప్పనిసరిగా మార్పు వస్తుంది. కంటెంట్ మరియు కటౌట్ రెండూ కలిస్తేనే సినిమా బతుకుతుంది. ఈ నిర్మాణం పూర్తిగా కూలిపోకపోవచ్చు కానీ, భవిష్యత్తులో కథ బలమే అసలైన ‘హీరో’గా మారక తప్పదు.
